APA Jurnalist Məktəbi APA Media Group-un peşəkar jurnalistikanın inkişafına və yeni media nəslinin formalaşdırılmasına yönəlmiş təhsil layihəsidir. Məktəbin əsas məqsədi nəzəri biliklərlə yanaşı, real redaksiya təcrübəsinə malik, operativ, məsuliyyətli və müasir media standartlarına uyğun çalışan jurnalistlər yetişdirməkdir.
Təlim proqramı xəbər jurnalistikası, reportyorluq, redaktə, faktların yoxlanılması, media etikası, rəqəmsal media, multimedia məzmununun hazırlanması və sosial media jurnalistikası kimi istiqamətləri əhatə edir. İştirakçılar peşəkar jurnalistlər və media rəhbərlərinin rəhbərliyi altında həm nəzəri biliklər əldə edir, həm də APA Media Group-un real xəbər mühitində praktiki bacarıqlar qazanırlar.
APA Jurnalist Məktəbi təkcə təlim proqramı deyil, eyni zamanda gələcəyin media peşəkarlarının formalaşdığı platformadır. Məktəbin məzunlarının bir qismi artıq APA Media Group-da və Azərbaycanın müxtəlif media qurumlarında fəaliyyət göstərir ki, bu da layihənin praktiki nəticələrini və davamlı inkişafını nümayiş etdirir.
APA Media Group yarandığı gündən etibarən Azərbaycanın xəbər jurnalistikasında mühüm rol oynayıb. Bu illər ərzində yüzlərlə jurnalist məhz APA-da peşəkar fəaliyyətə başlayıb, müxtəlif media qurumlarında baş redaktor, media rəhbəri, mətbuat katibi və kommunikasiya mütəxəssisi kimi karyerasını davam etdirib. APA Jurnalist Məktəbi bu ənənəni müasir media tələblərinə uyğun şəkildə davam etdirərək yeni nəslin peşəkar inkişafına töhfə verir.
Əsas üstünlüklərimiz
• Praktiki jurnalistika və real redaksiya təcrübəsinə əsaslanan tədris.
• Təlimlərin tanınmış jurnalistlər, redaktorlar və media ekspertləri tərəfindən keçirilməsi.
• Xəbər jurnalistikası, rəqəmsal media, multimedia və sosial media üzrə müasir proqram.
• APA Media Group-un redaksiyalarında təcrübə keçmək və peşəkar iş mühiti ilə tanış olmaq imkanı.
• Uğurlu məzunlar üçün APA Media Group və digər media qurumlarında karyera imkanları.
• Azərbaycanın peşəkar jurnalistika məktəblərindən birinin ənənələrini davam etdirən təhsil platforması.