İnformasiya Agentliyi

Azərbaycanın aparıcı informasiya və media istehsalı mərkəzi 

2004-cü ildə yaradılan APA İnformasiya Agentliyi APA Media Group-un tərkibində fəaliyyət göstərən aparıcı informasiya agentliyi və qrupun əsas xəbər, məlumat və analitika istehsalı mərkəzidir. 

İyirmi ildən artıq fəaliyyəti ərzində APA Azərbaycan media sənayesinin inkişafına mühüm töhfə vermiş, peşəkar jurnalistika, rəqəmsal media və operativ informasiya istehsalı sahəsində yeni standartlar formalaşdırmışdır. Bu gün agentlik yalnız gündəlik xəbər istehsal edən media qurumu deyil, eyni zamanda zəngin kontent arxivi, analitik potensialı və çoxdilli informasiya resursları ilə regionun ən etibarlı media platformalarından biridir. 

APA Azərbaycan, Cənubi Qafqaz və yaxın region üzrə real vaxt rejimində xəbərlər, foto, video, analitik materiallar və multimedia kontenti hazırlayır. Agentliyin istehsal etdiyi məlumatlar media qurumları, dövlət təşkilatları, beynəlxalq institutlar, diplomatik nümayəndəliklər, universitetlər, tədqiqat mərkəzləri və özəl sektor tərəfindən etibarlı informasiya mənbəyi kimi istifadə olunur. 

Missiyamız 

APA-nın missiyası cəmiyyətə dəqiq, operativ, qərəzsiz və etibarlı informasiya təqdim etmək, peşəkar jurnalistika prinsiplərini qorumaq və Azərbaycan haqqında obyektiv məlumatların beynəlxalq informasiya məkanında yayılmasına töhfə verməkdir. 

Agentlik müasir jurnalistika prinsiplərini innovativ texnologiyalarla birləşdirərək ictimai əhəmiyyət daşıyan məlumatların operativ şəkildə toplanmasını, yoxlanılmasını, emalını və çoxdilli auditoriyaya çatdırılmasını təmin edir. 

Azərbaycanın media tarixində yeniliklərin müəllifi 

APA fəaliyyətə başladığı gündən etibarən Azərbaycan media bazarında bir sıra fundamental yeniliklərə imza atmış və müasir xəbər istehsalı modelinin formalaşmasına öncüllük etmişdir. 

Agentlik: 

• Azərbaycanda xəbərləri birbaşa Azərbaycan dilində operativ yayımlayan ilk müstəqil informasiya agentliyidir; 

• ölkədə özünün müstəqil onlayn xəbər platformasını yaradan ilk informasiya agentliyidir; 

• Azərbaycanda video xəbər xidmətini sistemli şəkildə yaradan ilk informasiya agentliyidir; 

• internet üzərindən canlı xəbər yayımını həyata keçirən ilk informasiya agentliyidir; 

• müstəqil informasiya agentlikləri arasında Azərbaycanın bütün bölgələrini və xarici ölkələri əhatə edən geniş müxbir şəbəkəsini yaradan ilk agentlikdir; 

• müxtəlif xəbər istiqamətlərini vahid redaksiya modeli altında birləşdirən ilk universal müstəqil informasiya agentliyidir. 

Bu yeniliklər Azərbaycan media sənayesində rəqəmsal transformasiyanın əsas mərhələlərindən biri hesab olunur və APA-nın innovativ media qurumu kimi formalaşmasında mühüm rol oynamışdır. 

Universal xəbər istehsalı modeli 

APA fəaliyyətə başladığı dövrdə Azərbaycan media bazarında mövcud olan ənənəvi yanaşmanı dəyişdi. 

Həmin dövrə qədər fəaliyyət göstərən əksər müstəqil informasiya agentlikləri yalnız müəyyən istiqamətlər üzrə ixtisaslaşmışdı. Bəziləri əsasən siyasi xəbərlər, digərləri isə iqtisadi və ya biznes xəbərləri hazırlayırdı. 

APA isə ilk dəfə olaraq ölkənin ictimai həyatının bütün əsas istiqamətlərini vahid redaksiya sistemi altında birləşdirərək universal xəbər istehsalı modelini tətbiq etdi. 

Bu gün agentlik aşağıdakı istiqamətlər üzrə gündəlik məlumat istehsal edir: 

• Dövlət və daxili siyasət 

• Xarici siyasət və diplomatiya 

• Parlament və hökumət fəaliyyəti 

• Hüquq və məhkəmə sistemi 

• Təhlükəsizlik 

• İqtisadiyyat 

• Maliyyə bazarları 

• Bank sektoru 

• Sığorta bazarı 

• Energetika 

• Biznes 

• Sosial məsələlər 

• Cəmiyyət 

• Elm və təhsil 

• Səhiyyə 

• Mədəniyyət 

• İdman 

• Turizm 

• Texnologiya və innovasiya 

• Fövqəladə hadisələr 

• Regional və beynəlxalq hadisələr 

Bu model APA-ya müxtəlif sahələri əhatə edən balanslaşdırılmış, davamlı və zəngin informasiya bazası formalaşdırmağa imkan vermişdir. 

Multimedia jurnalistikası 

APA Azərbaycanda multimedia jurnalistikasının inkişafına öncüllük edən media qurumlarından biridir. 

Agentlik yazılı xəbərlərlə yanaşı: 

• foto reportajlar, 

• video reportajlar, 

• canlı bağlantılar, 

• xüsusi çəkilişlər, 

• studiya müsahibələri, 

• sənədli video materiallar, 

• hadisə yerindən operativ video görüntülər 

hazırlayaraq müxtəlif media platformalarının informasiya tələbatını qarşılayır. 

Azərbaycanın bütün bölgələrində fəaliyyət göstərən müxbirlər və operatorlar sayəsində ölkənin istənilən nöqtəsindən operativ foto və video materialların hazırlanması təmin edilir. 

Qlobal müxbir şəbəkəsi 

APA-nın əsas üstünlüklərindən biri geniş müxbir şəbəkəsidir. 

Agentlik Azərbaycanın bütün iqtisadi və inzibati bölgələrində fəaliyyət göstərən regional müxbirlərlə yanaşı, ABŞ, Böyük Britaniya, Fransa, Türkiyə, Gürcüstan, İran, Rusiya və digər ölkələrdə çalışan xarici müxbirlər vasitəsilə beynəlxalq informasiya axınını təmin edir. 

Bu infrastruktur APA-ya hadisələri birbaşa mənbədən izləmək, məlumatları operativ şəkildə yoxlamaq və oxuculara dəqiq informasiya təqdim etmək imkanı verir. 

APA Economics 

APA iqtisadi jurnalistikanın inkişafına xüsusi önəm verir. 

Bu məqsədlə yaradılmış APA Economics platforması iqtisadiyyat, maliyyə bazarları, bank sektoru, sığorta bazarı, investisiyalar, enerji və biznes üzrə ixtisaslaşmış xəbər və analitik məlumatlar hazırlayır. 

Agentlik uzun illər ərzində Azərbaycan bankları və sığorta şirkətləri üzrə reytinqlər, müqayisəli statistik göstəricilər, bazar icmalları və analitik hesabatlar hazırlamışdır. 

Bu materiallar dövlət qurumları, maliyyə institutları, investorlar, biznes strukturları və tədqiqat təşkilatları tərəfindən istinad olunan etibarlı informasiya mənbələrindən biridir. 

APA Blog – Ekspert Platforması 

APA xəbər istehsalı ilə yanaşı, peşəkar analitik düşüncənin inkişafına da xüsusi önəm verir. 

Bu məqsədlə fəaliyyət göstərən APA Blog platforması tanınmış ekspertlər, analitiklər, akademiklər, tədqiqatçılar və sahə mütəxəssisləri üçün açıq müəllif platforması rolunu oynayır. 

Platformada siyasət, beynəlxalq münasibətlər, iqtisadiyyat, təhlükəsizlik, hüquq, texnologiya, cəmiyyət və digər aktual mövzular üzrə müəllif yazıları, analitik məqalələr, ekspert rəyləri və araşdırmalar dərc olunur. 

APA Blog müxtəlif baxışların təqdim edilməsini, sağlam ictimai müzakirələrin inkişafını və yüksək keyfiyyətli analitik kontentin formalaşmasını dəstəkləyir. 

Etibarlılıq və peşəkar standartlar 

APA fəaliyyətini peşəkar jurnalistika prinsipləri, etik standartlar və beynəlxalq idarəetmə yanaşmaları əsasında qurur. 

Agentlik Azərbaycan Mətbuat Şurasının üzvüdür və Azərbaycan Respublikasının media reyestrində rəsmi qeydiyyatdan keçmiş informasiya agentliyidir. 

APA Azərbaycanda öz brendlərini və əmtəə nişanlarını dövlət qeydiyyatından keçirərək hüquqi mühafizə ilə təmin edən ilk xəbər şirkətidir. 

Şirkətin əsas brendləri dövlət qeydiyyatına alınmış və əqli mülkiyyət hüquqları ilə qorunur. 

APA həmçinin beynəlxalq keyfiyyət və idarəetmə standartlarına uyğun fəaliyyət göstərdiyini təsdiq edən Global Certification Limited sertifikatına malikdir. 

Fəaliyyətində redaksiya müstəqilliyi, faktların dəqiqliyi, mənbələrin yoxlanılması və etik jurnalistika prinsipləri əsas prioritetlər hesab olunur. 

Beynəlxalq nüfuz 

APA uzun illərdir Azərbaycan və Cənubi Qafqaz regionu üzrə ən çox istinad edilən informasiya mənbələrindən biridir. 

Agentliyin hazırladığı xəbərlər, foto və video materiallar müxtəlif dövrlərdə dünyanın aparıcı media qurumları tərəfindən istifadə edilmiş, APA beynəlxalq informasiya mübadiləsində etibarlı tərəfdaş kimi tanınmışdır. 

Çoxdilli xəbər xidməti, operativliyi, geniş müxbir şəbəkəsi və peşəkar redaksiya yanaşması APA-nın regionun nüfuzlu informasiya agentliklərindən biri kimi mövqeyini möhkəmləndirmişdir. 

Gələcəyə baxış 

APA informasiya agentliyi kimi formalaşmış güclü təcrübəsini yeni media texnologiyaları, rəqəmsal transformasiya və məlumat əsaslı xidmətlərlə birləşdirərək inkişafını davam etdirir. 

Agentlik yalnız xəbərlərin operativ yayımını deyil, eyni zamanda yüksək keyfiyyətli multimedia kontentinin, analitik materialların və zəngin informasiya resurslarının istehsalını prioritet istiqamət kimi müəyyən etmişdir. 

APA Media Group-un əsas media platforması olaraq APA bundan sonra da peşəkar jurnalistika, etibarlı informasiya və innovativ media həlləri sahəsində regionun aparıcı informasiya mərkəzlərindən biri olmağı hədəfləyir. 

İnformasiyadan Strateji Dəyərə

Müasir dünyada məlumat ən dəyərli strateji resurslardan biridir. Onun dəqiqliyi, etibarlılığı və sistemli şəkildə qorunması dövlət idarəçiliyindən biznes qərarlarına, elmi araşdırmalardan yeni texnologiyaların inkişafına qədər bütün sahələrdə mühüm rol oynayır.

APA İnformasiya Agentliyi 2005-ci ildən etibarən bu missiyanı həyata keçirərək Azərbaycanın siyasi, iqtisadi, sosial və beynəlxalq gündəmini ardıcıl şəkildə sənədləşdirir.

İllər ərzində hazırlanan hər bir xəbər, foto, video, analitik yazı və müsahibə yalnız cari informasiya kimi deyil, gələcək nəsillər üçün qorunan etibarlı məlumat resursu kimi dəyərləndirilir.

Bu gün APA tərəfindən formalaşdırılmış rəqəmsal arxiv ölkənin ən geniş müstəqil media məlumat bazalarından biridir və hər gün yeni məlumatlarla zənginləşməyə davam edir.

Rəqəmsal Məlumat Aktivləri

APA-nın fəaliyyətinin əsasını yalnız xəbər istehsalı deyil, informasiyanın uzunmüddətli qorunması və sistemləşdirilməsi təşkil edir.

Hazırda agentliyin informasiya resurslarına daxildir:

• 2005-ci ildən formalaşan rəqəmsal xəbər arxivi;

• 1,7 milyondan çox məqalə;

• 306 milyondan artıq söz;

• 3,6 milyondan çox fotoşəkil;

• Azərbaycan, ingilis, rus, fransız və fars dillərində hazırlanmış məzmun;

• analitik yazılar, müsahibələr və xüsusi layihələr.

Bu informasiya aktivləri Azərbaycanın ictimai, siyasi və iqtisadi inkişafını əks etdirən ən zəngin müstəqil media resurslarından biridir.

Rəqəmsal Arxiv

APA-nın rəqəmsal arxivi iyirmi ildən artıq müddətdə toplanmış və redaksiya tərəfindən təsdiqlənmiş informasiya resurslarından ibarətdir.

Arxivdə müxtəlif dövrlərə aid xəbərlər, foto və video materiallar, analitik yazılar, müsahibələr və xüsusi layihələr qorunur.

Bu məlumatlar yalnız jurnalistika üçün deyil, elmi araşdırmalar, media monitorinqi, bazar təhlilləri, tarixi tədqiqatlar və digər informasiya xidmətləri üçün də etibarlı mənbə rolunu oynayır.

Analitik Məzmun

APA operativ xəbərlərlə yanaşı, hadisələrin səbəb və nəticələrini araşdıran analitik materialların hazırlanmasına xüsusi önəm verir.

Agentlik siyasət, iqtisadiyyat, maliyyə, enerji, biznes, hüquq, beynəlxalq münasibətlər və digər sahələr üzrə analitik yazılar, ekspert rəyləri və xüsusi araşdırmalar hazırlayır.

Bu materiallar qərarvermə prosesini dəstəkləyən etibarlı informasiya resursları kimi dövlət qurumları, şirkətlər, beynəlxalq təşkilatlar və tədqiqatçılar tərəfindən istifadə olunur.

Məzmunun Lisenziyalaşdırılması

APA Media Group tərəfindən yaradılan xəbərlər, fotoşəkillər, video materiallar, analitik yazılar və digər redaksiya məzmunu müəllif hüquqları ilə qorunur və lisenziyalaşdırılır.

Media qurumları, dövlət təşkilatları, universitetlər, tədqiqat mərkəzləri və korporativ tərəfdaşlar APA ilə lisenziya müqavilələri əsasında müxtəlif formatlarda məzmun əldə edə bilərlər.

Şirkət müəllif hüquqlarının qorunmasına, məzmunun qanuni istifadəsinə və informasiya resurslarının məsuliyyətli paylaşılmasına xüsusi önəm verir.

Müəllif Hüquqları və İnformasiya Aktivlərinin Qorunması

APA İnformasiya Agentliyi tərəfindən hazırlanmış xəbərlər, fotoşəkillər, video materiallar, analitik məqalələr, statistik məlumatlar və digər redaksiya məzmunu APA Media Group-un əqli mülkiyyətidir.

Bu məzmun üzərindəki müəllif hüquqları qüvvədə olan qanunvericiliyə və beynəlxalq hüquq normalarına uyğun olaraq qorunur.

APA tərəfindən yaradılmış məlumatların tam və ya qismən istifadəsi, çoxaldılması, emalı, kommersiya məqsədilə istifadəsi və ya üçüncü şəxslərə təqdim edilməsi yalnız APA Media Group-un yazılı razılığı və ya müvafiq lisenziya əsasında mümkündür.

APA məlumatı yalnız xəbər kimi deyil, uzunmüddətli strateji və intellektual aktiv kimi qiymətləndirir və onun qorunmasını fəaliyyətinin əsas prinsiplərindən biri hesab edir.

İnnovasiya və Gələcək İnkişaf

Media sənayesində baş verən texnoloji dəyişikliklər informasiyanın yaradılması, idarə olunması və istifadəsinə yeni yanaşmalar formalaşdırır.

APA Media Group rəqəmsal transformasiya, məlumatların sistemləşdirilməsi, analitik həllərin inkişafı və yeni texnologiyaların tətbiqi istiqamətində fəaliyyətini davam etdirir.

Şirkət zəngin media arxivi, çoxdilli məzmunu və peşəkar redaksiya təcrübəsi əsasında gələcəyin informasiya həllərinin formalaşdırılmasına töhfə verməyi qarşısına məqsəd qoyur.