"APA Media Group"un layihəsi olan "APA Jurnalist Məktəbi" layihəsinin ilk məzunlarına sertifikatlar təqdim edilib.

Vüsalə Mahirqızı: APA Jurnalist Məktəbi davam edəcək

Bununla bağlı təşkil olunmuş tədbirdə çıxış edən "APA Media Group"un Baş direktoru Vüsalə Mahirqızı deyib ki, bu gün 20 məzuna sertifikatlar təqdim olunacaq.

"Bu üç aylıq müddətdə bizim məqsədimiz peşəkar, operativ, yeni media standartları ilə işləməyi bacaran jurnalist hazırlamaq üçün ilk addımı atmaq idi. Əlbəttə, jurnalist illərlə topladığı təcrübə, xəbər bazası ilə peşəkarlaşır. Lakin ilk addımların doğru yerdə atılması, doğru təcrübə imkanları jurnalist, xüsusilə xəbər jurnalisti üçün çox vacibdir. Bu, əksər halda jurnalistin sonrakı inkişafını müəyyən edən addım olur", - Vüsalə Mahirqızı qeyd edib.

Baş direktor bildirib ki, layihədə iştirak edən 20 iştirakçıdan 5-i artıq "APA Media Group"un strukturlarında, iki nəfər isə başqa media orqanlarında işə başlayıb: "Bu bizi çox sevindirir. Əminəm ki, bu layihənin məzunlarını tezliklə müxtəlif televiziya, radio kanallarında, agentlik və saytlarda görəcəyik".

Vüsalə Mahirqızı "APA Jurnalist Məktəbi”nin rəhbəri Qabil Abbasoğluna təşəkkürünü bildirib: "Qabil Abbasoğlu təcrübəli jurnalist kimi bu işin təşkilində çox böyük əziyyət çəkdi. Eyni zamanda təcrübəli telejurnalist İlqar Əlfi televiziya işinin təşkili və telejurnalistika ilə bağlı təcrübələrini bölüşdü. Təlimlərdə dəyərli jurnalistlər, yazıçılar təlim iştirakçıları ilə görüşüb, öz təcrübələrini bölüşdülər. “APA Media Group” olaraq biz onların hamısına minnətdarıq".

Baş direktor aprel ayında "APA Jurnalist Məktəbi"nin növbəti təlimlərə başlayacağını da elan edib: "Biz davam edəcəyik. Növbəti məzunlar olacaq. Ümid edirəm ki, bu məktəb yüzlərlə məzunu ilə tanınacaq".

Qabil Abbasoğlu: APA və mən həmişə sizə dəstək olmağa hazırıq

"APA Jurnalist Məktəbi"nin rəhbəri Qabil Abbasoğlu məzunları təbrik edib: "Bu üç aylıq müddətdə davam etdiniz, deməli, bu layihə həm də sizin üçün maraqlı idi. APA və mən həmişə sizə dəstək olmağa hazırıq".

Qabil Abbasoğlu jurnalistikanın çətin peşə olduğunu bir daha xatırladıb: “Bu layihə mənim üçün ilk müəllim təcrübəsi idi. Burda sizinlə birlikdə öyrəndik, müzakirə etdik, layihələr üzərində işlədik. Maraqlı təlimlərimiz, qonaqlarımız oldu. Bilirəm ki, bu təcrübə fəaliyyətinizdə sizə həmişə lazım olacaq. Həmişə öyrənməyə çalışın, bu, jurnalist üçün çox vacibdir".

Məzunlara tövsiyə: Daim öyrənin, araşdırın, mütaliə edin

"APA Jurnalist Məktəbi”nin təlimçisi, telejurnalist Ilqar Əlfi də çıxışında məzunları təbrik edib: "Burda iştirak edən hər bir gənc bizim övladımızdır və mən də həmişə sizə dəstək olmağa hazıram. Jurnalist üçün vacib mühüm bir xüsusiyyəti daşımağı tövsiyə edirəm. Bu parlaq peşədə nəfsinə hakim ola bilmək çox vacibdir. Onu bacaranlar həmişə var olur".

Bahəddin Həziyev: Bu cür məktəbi yaratmaq APA-nın haqqıdır

"Bizim yol" qəzetinin Baş redaktoru, təlimlərdə iştirakçılara ustad dərsi keçmiş Bahəddin Həziyev belə bir məktəbin yaradılmasından məmnun olduğunu deyib: "APA öz dəsti-xətti ilə onsuz da məktəbdir. APA-da onlarla imza yetişib, bu cür məktəbi yaratmaq APA-nın haqqıdır".

Bahəddin Həziyev bildirib ki, bu gün təhsilin əsas hədəfi öyrənməyi öyrətmək olmalıdır: "Əgər öyrənəcəyin mənbəni bilirsənsə, öyrənmək həmişə mümkündü və əlçatandı. Burda Sizə öyrənməyin, araşdırmağın yolları barədə danışıldı".

Bahəddin Həziyev məzunlara uğurlar arzulayıb, gələcək təlimlərdə də iştirak edəcəyini bildirib.

Şərif Ağayar: Öyrənməyə burdan başladığınıza görə peşman olmayacaqsınız

Jurnalist məktəbində ustad dərsi keçmiş, redaktənin sirlərini öyrətmiş yazıçı Şərif Ağayar da məzunları təbrik edib: "Mən əminəm ki, siz gələcəkdə yolunuzun APA-dan düşdüyünə, öyrənməyə məhz burdan başladığınıza görə peşman olmayacaqsınız" deyən Şərif Ağayar bildirib ki, burda xəbər mühiti, peşəkar və sistemli xəbər işi var”.

"Bu sistemli iş də uğurlu nəticə yaradır" deyən yazıçı məktəbin məzunlarına uğur arzu edib.

Könül Cəfərli: Hər bir gənc jurnalistə yolunun APA-dan keçməsini arzu edirəm

Məzunlara telejurnalistika mövzusunda təlim keçmiş jurnalist Könül Cəfərli bu məktəbdə olmaqdan məmnunluğunu ifadə edib: “Hər bir gənc jurnalistə yolunun APA-dan keçməsini arzu edirəm. Bunu sizə, sadəcə, bir təlimçi kimi yox, həm də bu məktəbdən keçmiş biri kimi deyirəm.

APA-da jurnalistin inkişafı üçün olan şərait, özünü ifadə etməyinə tanınan imkanı çox az yerdə tapmaq olur" .

Rövşanə Ağasəfqızı: Burda iştirak edən gəncləri çox parlaq gördüm

Telejurnalist Rövşanə Ağasəfqızı da çıxışında gəncləri təbrik edib: "Mənim üçün yenidən gənclərlə bir arada işləmək çox xoş oldu. Burda iştirak edən gəncləri çox parlaq gördüm. Hər birinizə karyeranızda uğurlar arzulayıram".

Rövşanə Ağasəfqızı məzunlara çox oxumağı, mütaliə etməyi, daim axtarışda olmağı, araşdırmağı tövsiyə edib.

"Xəbərin bir imzası olsaydı, o imza "APA" olardı"

Məzunlar adından çıxış edən İlkin Naib artıq APA İnformasiya Agentliyində əməkdaş olaraq işə başladığını deyib.

O, belə bir fürsət üçün "APA Media Group"a təşəkkürünü bildirib.

"Xəbərin bir imzası olsaydı, o imza "APA" olardı" deyən İlkin Naib istər təlimlərdə, istərsə də iş mühitindəki müşahidəsini bölüşüb: "Burda hamı öyrətməyə çalışır. Kimdənsə öyrənmək istəyəndə həvəslə dəstək görürsən. Bu mühit adama jurnalistikanı sevdirir".

Nurşən Quliyev: Bilin ki, APA adlı bir eviniz var

"APA Media Group"un baş redaktoru Nurşən Quliyev çıxışında məktəbin yaradılmasının məqsədlərindən danışıb, məzunları təbrik edib: "Bu məktəbin yaradılmasının müəyyən riskləri vardı. Çox yaxşı haldır ki, burada ilk gündən qatılan dinləyicilərin əksəriyyəti sona qədər davam etdi".

Nurşən Quliyev qeyd edib ki, indiyə qədər APA-dan çox jurnalistin yolu keçib: "Biz arzu edirik ki, bu məktəbin dinləyiciləri gələcəkdə elə yerlərə çatsınlar ki, onlarla fəxr edək. Bu günə qədər APA-dan böyük jurnalist ordusu keçib. Onların arasında indi dövlət işlərində çalışanlar, başqa saytlarda baş redaktor olanlar var. Biz onların hamısı ilə fəxr edirik. Arzu edirik ki, siz də bu ordunun xatırlananlarından olasınız".

Nurşən Quliyev deyib ki, APA dinləyicilərinə gələcək karyeralarında həmişə dəstək verməyə hazırdır: "Harda olursunuz olun, həmişə bilin ki, APA adlı bir eviniz var. Biz sizə daim dəstək olmağa hazırıq".

Sonra məzunlara sertifikatlar təqdim edilib.

Qeyd edək ki, təlimlər üç ay davam edib.

"APA Media Group"un Baş direktoru Vüsalə Mahirqızı, "APA Media Group"un Baş redaktoru Nurşən Quliyev, APA İnformasiya Agentliyinin Baş redaktoru Fərid Mirzəyev, APA İnformasiya Agentliyinin redaktoru Ramiz Mikayıloğlu, APA İnformasiya Agentliyinin redaktoru Mirmehdi Ağaoğlu, APA İnformasiya Agentliyinin redaktoru Nigar Abbasova, APA TV-nin direktoru Orxan Məmmədli, "Norma Hüquq şirkəti"nin direktoru, hüquqşünas Şamil Paşayev, "Lent.az" portalının Baş redaktoru Hafiz Heydərov, “Lent.az” portalının redaktoru Azər Hüseynbala, “Vesti.az” portalının Baş redaktoru Nicat Hacıyev, telejurnalistlər Könül Cəfərli, Rövşanə Ağasəfqızı, Almaz Mahmud, Kamran Qasımov, jurnalist Bahəddin Həzi, yazıçı Şərif Ağayar, APA İnformasiya Agentliyinin multi-media redaktoru Vüqar Abışov, marketinq mütəxəssisləri Tural Rüstəmli və Müzəffər Qaraxanlı təlim iştirakçıları ilə öz təcrübələrini bölüşüb, onlara ustad dərsləri veriblər.

Türkiyənin Azərbaycandakı səfirliyinin mətbuat müşaviri Alptekin Cihangir İşbilir “APA Media Group”un qonağı olub.

“APA Media Group”un rəhbəri Vüsalə Mahirqızı “APA Media Group”a aid media qurumlarının fəaliyyəti barədə qonağı məlumatlandırıb.

Görüşdə "APA Media Group"la gələcək əməkdaşlıq perspektivləri müzakirə olunub. Həmçinin Azərbaycan və Türkiyə media qurumları arasındakı əməkdaşlığın vacibliyi, Türkiyə Azərbaycan ortaq media platformasının inkişafının əhəmiyyəti vurğulanıb.

İranın Azərbaycandakı müvəqqəti işlər vəkili Seyed Cəfər Ağai “APA Media Group”un qonağı olub.

“APA Media Group”da keçirilən görüşdə Azərbaycan və İran mediası arasında əməkdaşlıq məsələləri ətrafında geniş fikir mübadiləsi aparılıb.

İki ölkə mediası arasında əlaqələrin inkişaf etdirilməsinin zəruriliyini vurğulayıb, münasibətlərin dərinləşməsində mətbuatın xüsusi rol oynadığı qeyd edilib.

“APA MEDİA GROUP”a daxil olan APA Televiziyası Ailə TV, CityNet, Ultel və digər kabel televiziyaları, həmçinin İPTV platformalarında yayıma başlayıb.

“Ailə TV”-nin rəqəmsal yayımında APA TV-ni izləmək üçün 19, Ailə TV-nin İPTV platformasında isə 79-cu kanalı seçməlisiniz.

“CityNet”də APA TV-yə baxmaq üçün 11-ci kanalı, “Ultel” də isə 44-cü kanalı seçmək lazımdır.

APA TV-nin yayım vaxtı səhər 08-00-dan gecə 02:00-yə qədər artırılıb.

Xatırladaq ki, Azərbaycan Respublikası Audiovizual Şurası tərəfindən 30 noyabr 2022-ci ildə APA televiziyasına platforma yayımçısı lisenziyası verilib.

Səudiyyə Ərəbistanı Krallığının Azərbaycandakı fövqəladə və səlahiyyətli səfiri İssam bin Saleh əl-Cuteyli (Essam Bin Saleh Algetale) “APA Media Group”un qonağı olub.

“APA Media Group”un rəhbəri Vüsalə Mahirqızı səfiri salamlayıb, onu “APA Media Group”da görməkdən məmnunluğunu ifadə edib.

Səfir İssam bin Saleh əl-Cuteyli Səudiyyə Ərəbistanı və Azərbaycan arasında münasibətlərin yüksək səviyyədə olduğunu bildirib. Səfir bu münasibətlərin iki ölkənin xalqlarına çatdırılmasında medianın və səfirliyin üzərinə mühüm vəzifə düşdüyünü vurğulayıb. Diplomat Azərbaycan mediası ilə əlaqələrin gücləndirilməsinə çalışdığını bildirib.  

“APA Media Group”un Azərbaycan mediasında özünəməxsus yeri olduğunu diqqətə çatdıran İssam bin Saleh əl-Cuteyli iki ölkə mətbuatı arasında əməkdaşlığın zəruriliyini qeyd edib, bu əməkdaşlığın hər iki ölkə və xalqlarımız arasında münasibətlərin daha da güclənməsinə töhfə verəcəyini söyləyib.

Diplomat Səudiyyə Ərəbistanı-Azərbaycan əməkdaşlığı istiqamətində 2024-cü ildə bir neçə proqramın həyata keçirilməsinin nəzərdə tutulduğunu da vurğulayıb.

Öz növbəsində, Vüsalə Mahirqızı Səudiyyə Ərəbistanı Krallığının Azərbaycandakı səfiri kimi fəaliyyətə başladığı qısa müddət ərzində İssam bin Saleh əl-Cuteylinin mətbuatla münasibətə xüsusi diqqət yetirməsini yüksək qiymətləndirib. O, “APA Media Group”un iki ölkə arasında münasibətlərin daha da genişlənməsi işinə öz töhfəsini verməyə, bu kontekstdə Səudiyyə Ərəbistanı səfirliyi ilə əməkdaşlığa hazır olduğunu qeyd edib. Vüsalə Mahirqızı Azərbaycan və Səudiyyə Ərəbistanının media orqanları arasında əməkdaşlığın iki ölkə xalqlarının bir-birini daha yaxından tanımasında mühüm rol oynaya biləcəyini diqqətə çatdırıb.

Dövlət Turizm Agentliyi və APA “Media Group”un birgə təşkilatçılığı ilə keçirilən "Kəndimizə gedən yol" mobil film müsabiqəsinin qalibləri məlum olub.

APA xəbər verir ki, qaliblərin təqdimat mərasimində ölkənin tanınmış rejissorları, kinoşünaslar, yazıçı və şairlər, həmçinin müsabiqəyə marağı olan qonaqlar iştirak edib.

Çıxış edən müsabiqənin direktoru Orxan Məmmədli ideyanın yaranmasından bəhs edib: "Mobil telefonla çəkilən materiallarda onsuz da müəyyən mənada film adına nəsə olur. Sadəcə onu doğru yönləndirmək və doğru şəkildə görmək lazımdır. Biz də düşündük ki, belə bir müsabiqəni ərsəyə gətirmək lazımdır".

“APA Media Group”un baş direktoru Nurşən Quliyev, öz növbəsində, müsabiqənin faydalı tərəflərindən danışıb: "Ölkəmizin görülməmiş, gəzilməmiş yerlərinin üzə çıxarılması, özünəməxsusluğunun göstərilməsi üçün bu müsabiqə lazımlı bir layihədir. Onun əsas faydalı tərəflərindən biri turizm sahəsinin media ilə əməkdaşlığının artırılması, yeni layihələrə yol açılmasıdır. Arzu edək ki, bu cür müsabiqələr tendensiya halını alsın, davamlı olsun".

Dövlət Turizm Agentliyinin sədrinin müşaviri Kənan Quluzadə çıxışında layihənin böyük marağa səbəb olmasına diqqət çəkib.

"Bu cür layihələr turizm baxımından da, faydalıdır. Müsabiqədə iştirak edənləri, o cümlədən qalibləri təbrik edirəm. Layihənin davamlı olmasını arzu edirəm", - Kənan Quluzadə qeyd edib.

Münsiflər heyətinin üzvü, Azərbaycan Kinematoqrafçılar İttifaqının katibi, kinorejissor Əli İsa Cabbarov isə gələcək layihələrdə Azərbaycan Kimematoqrafçılar İttifaqı adından lazımi dəstəyi verəcəklərinə hazır olduqlarını bildirib: "Vətənə nə zamansa mobil telefonun gözü ilə baxmaq lazımdır. Buna ehtiyac var. Bəzəkli görüntüləri onsuz da televizorda görürük. Dediyim kimi, davamlı olsun və gələn dəfələrdə AKİ olaraq layihəyə hər cür dəstək verməyə hazırıq".

Çıxışlardan sonra qaliblərin adları açıqlanıb və mükafatlandırma baş tutub.

Sosial mediada onlayn səsvermənin qalibi "Kəndimizə gedən yol" filmi ilə Sərvər Abdullayev olub.

Üçüncü yerə ortaq müəllifliklə Elvin Məcidli və Dilavər Manafov "Tut yolu" filmi ilə layiq görülüb.

İkinci yer üzrə münsiflərin qərarına əsasən, iki nəfər qalib seçilib.

Bunlar "Kəndimizə gedən yol - Qələbin" filmi ilə Xəyal İsgəndərov və "Bal yolu" filmi ilə Orxan Sadıqovdur.

Müsabiqədə birinci yer isə "Bir dəfə Nicdə" filmi ilə Xəyyam Mazanova (Ömər Xəyyam) verilib.

Qeyd edək ki, müsabiqənin münsiflər heyətində kinorejissor Əli İsa Cabbarov, kinoşünaslar Sevda Sultanova və Aygün Aslan yer alıb.

Münsiflər heyətinin səsverməsi anonim formada aparılıb.

Qətər Dövlətinin Azərbaycandakı fövqəladə və səlahiyyətli səfiri Faysal bin Abdullah Hamad Abdullah Al Henzab APA Qrupunda olub.

Səfir APA Qrupunun rəhbəri Vüsalə Mahirqızı ilə görüşüb.

Görüşdə iki ölkənin KİV-ləri arasında əlaqələr və müxtəlif istiqamətlərdə əməkdaşlıq müzakirə olunub

Diplomat ölkəsinin Azərbaycanla əlaqələrə böyük önəm verdiyini və davam edən Vətən müharibəsində Azərbaycanın ədalətli işini dəstəklədiyini qeyd edib.

O, iki ölkə arasında turizm, informasiya texnologiyaları və digər sahələrdə əməkdaşlıq, qarşılıqlı sərmayə qoyuluşu ilə bağlı mühüm layihələr üzərində işlədiyini bildirib. Səfir onu da vurğulayıb ki, iki ölkənin media qurumları arasında əməkdaşlıq proqramının təşkili, bir-birini daha yaxından tanımaq və perspektiv sahələrlə tanış olmaq üçün hər iki ölkə jurnalistlərinin qarşılıqlı səfərlərinin təşkili istiqamətində iş aparılır. Feysəl bin Abdullah Əl Henzab Azərbaycan Vətən Müharibəsi başa çatdıqdan və koronavirus pandemiyasından sonra Azərbaycan ilə Qətər arasında münasibətlərin daha da dərinləşməsi üçün yeni imkanların yaranacağına əminliyini ifadə edib.

V.Mahirqızı da öz növbəsində Qətər dövlətinə və onun mediasına Azərbaycanın ədalətli işində göstərdiyi dəstəyə görə minnətdarlığını bildirib. V.Mahirqızı Azərbaycan və Qətərin hər zaman dost ölkələr olduğunu, APA İnformasiya Agentliyinin Qətərin Azərbaycandakı səfirliyi, eləcə də bu ölkənin media qurumları ilə hər zaman sıx əməkdaşlıq etdiyini diqqətə çatdırıb. Bildirilib ki, APA-Qrupu əlillərin müraciəti əsasında Gəncə, Bərdə və digər şəhərlərin ermənilər tərəfindən raketlərdən atəşə tutulması nəticəsində insanların həlak olması, yaşayış binalarının, mülki obyektlərin dağıdılmasını əks etdirən materialları onlara təqdim edib. Cəzirənin Türkiyədəki bürosu.

O, həm ölkələrimiz, həm də ölkələrin media qurumları arasında əməkdaşlığın dərinləşdirilməsi üçün geniş rifahların olduğunu deyib, bunun üçün birgə layihələrin həyata keçirilməsinin, o cümlədən media nümayəndələrinin qarşılıqlı səfərlərinin təşkilinin vacibliyi diqqətə çatdırılıb.

V.Mahirqızı qeyd edib ki, APA-Qrupuna daxil olan qurumlar ölkələrimiz arasında əlaqələrin daha da dərinləşdirilməsi işinə informasiya dəstəyi verməyə hazırdır.