“APA MEDİA GROUP”a daxil olan APA Televiziyası Ailə TV, CityNet, Ultel və digər kabel televiziyaları, həmçinin İPTV platformalarında yayıma başlayıb.

“Ailə TV”-nin rəqəmsal yayımında APA TV-ni izləmək üçün 19, Ailə TV-nin İPTV platformasında isə 79-cu kanalı seçməlisiniz.

“CityNet”də APA TV-yə baxmaq üçün 11-ci kanalı, “Ultel” də isə 44-cü kanalı seçmək lazımdır.

APA TV-nin yayım vaxtı səhər 08-00-dan gecə 02:00-yə qədər artırılıb.

Xatırladaq ki, Azərbaycan Respublikası Audiovizual Şurası tərəfindən 30 noyabr 2022-ci ildə APA televiziyasına platforma yayımçısı lisenziyası verilib.

Səudiyyə Ərəbistanı Krallığının Azərbaycandakı fövqəladə və səlahiyyətli səfiri İssam bin Saleh əl-Cuteyli (Essam Bin Saleh Algetale) “APA Media Group”un qonağı olub.

“APA Media Group”un rəhbəri Vüsalə Mahirqızı səfiri salamlayıb, onu “APA Media Group”da görməkdən məmnunluğunu ifadə edib.

Səfir İssam bin Saleh əl-Cuteyli Səudiyyə Ərəbistanı və Azərbaycan arasında münasibətlərin yüksək səviyyədə olduğunu bildirib. Səfir bu münasibətlərin iki ölkənin xalqlarına çatdırılmasında medianın və səfirliyin üzərinə mühüm vəzifə düşdüyünü vurğulayıb. Diplomat Azərbaycan mediası ilə əlaqələrin gücləndirilməsinə çalışdığını bildirib.  

“APA Media Group”un Azərbaycan mediasında özünəməxsus yeri olduğunu diqqətə çatdıran İssam bin Saleh əl-Cuteyli iki ölkə mətbuatı arasında əməkdaşlığın zəruriliyini qeyd edib, bu əməkdaşlığın hər iki ölkə və xalqlarımız arasında münasibətlərin daha da güclənməsinə töhfə verəcəyini söyləyib.

Diplomat Səudiyyə Ərəbistanı-Azərbaycan əməkdaşlığı istiqamətində 2024-cü ildə bir neçə proqramın həyata keçirilməsinin nəzərdə tutulduğunu da vurğulayıb.

Öz növbəsində, Vüsalə Mahirqızı Səudiyyə Ərəbistanı Krallığının Azərbaycandakı səfiri kimi fəaliyyətə başladığı qısa müddət ərzində İssam bin Saleh əl-Cuteylinin mətbuatla münasibətə xüsusi diqqət yetirməsini yüksək qiymətləndirib. O, “APA Media Group”un iki ölkə arasında münasibətlərin daha da genişlənməsi işinə öz töhfəsini verməyə, bu kontekstdə Səudiyyə Ərəbistanı səfirliyi ilə əməkdaşlığa hazır olduğunu qeyd edib. Vüsalə Mahirqızı Azərbaycan və Səudiyyə Ərəbistanının media orqanları arasında əməkdaşlığın iki ölkə xalqlarının bir-birini daha yaxından tanımasında mühüm rol oynaya biləcəyini diqqətə çatdırıb.

Dövlət Turizm Agentliyi və APA “Media Group”un birgə təşkilatçılığı ilə keçirilən "Kəndimizə gedən yol" mobil film müsabiqəsinin qalibləri məlum olub.

APA xəbər verir ki, qaliblərin təqdimat mərasimində ölkənin tanınmış rejissorları, kinoşünaslar, yazıçı və şairlər, həmçinin müsabiqəyə marağı olan qonaqlar iştirak edib.

Çıxış edən müsabiqənin direktoru Orxan Məmmədli ideyanın yaranmasından bəhs edib: "Mobil telefonla çəkilən materiallarda onsuz da müəyyən mənada film adına nəsə olur. Sadəcə onu doğru yönləndirmək və doğru şəkildə görmək lazımdır. Biz də düşündük ki, belə bir müsabiqəni ərsəyə gətirmək lazımdır".

“APA Media Group”un baş direktoru Nurşən Quliyev, öz növbəsində, müsabiqənin faydalı tərəflərindən danışıb: "Ölkəmizin görülməmiş, gəzilməmiş yerlərinin üzə çıxarılması, özünəməxsusluğunun göstərilməsi üçün bu müsabiqə lazımlı bir layihədir. Onun əsas faydalı tərəflərindən biri turizm sahəsinin media ilə əməkdaşlığının artırılması, yeni layihələrə yol açılmasıdır. Arzu edək ki, bu cür müsabiqələr tendensiya halını alsın, davamlı olsun".

Dövlət Turizm Agentliyinin sədrinin müşaviri Kənan Quluzadə çıxışında layihənin böyük marağa səbəb olmasına diqqət çəkib.

"Bu cür layihələr turizm baxımından da, faydalıdır. Müsabiqədə iştirak edənləri, o cümlədən qalibləri təbrik edirəm. Layihənin davamlı olmasını arzu edirəm", - Kənan Quluzadə qeyd edib.

Münsiflər heyətinin üzvü, Azərbaycan Kinematoqrafçılar İttifaqının katibi, kinorejissor Əli İsa Cabbarov isə gələcək layihələrdə Azərbaycan Kimematoqrafçılar İttifaqı adından lazımi dəstəyi verəcəklərinə hazır olduqlarını bildirib: "Vətənə nə zamansa mobil telefonun gözü ilə baxmaq lazımdır. Buna ehtiyac var. Bəzəkli görüntüləri onsuz da televizorda görürük. Dediyim kimi, davamlı olsun və gələn dəfələrdə AKİ olaraq layihəyə hər cür dəstək verməyə hazırıq".

Çıxışlardan sonra qaliblərin adları açıqlanıb və mükafatlandırma baş tutub.

Sosial mediada onlayn səsvermənin qalibi "Kəndimizə gedən yol" filmi ilə Sərvər Abdullayev olub.

Üçüncü yerə ortaq müəllifliklə Elvin Məcidli və Dilavər Manafov "Tut yolu" filmi ilə layiq görülüb.

İkinci yer üzrə münsiflərin qərarına əsasən, iki nəfər qalib seçilib.

Bunlar "Kəndimizə gedən yol - Qələbin" filmi ilə Xəyal İsgəndərov və "Bal yolu" filmi ilə Orxan Sadıqovdur.

Müsabiqədə birinci yer isə "Bir dəfə Nicdə" filmi ilə Xəyyam Mazanova (Ömər Xəyyam) verilib.

Qeyd edək ki, müsabiqənin münsiflər heyətində kinorejissor Əli İsa Cabbarov, kinoşünaslar Sevda Sultanova və Aygün Aslan yer alıb.

Münsiflər heyətinin səsverməsi anonim formada aparılıb.

Qətər Dövlətinin Azərbaycandakı fövqəladə və səlahiyyətli səfiri Faysal bin Abdullah Hamad Abdullah Al Henzab APA Qrupunda olub.

Səfir APA Qrupunun rəhbəri Vüsalə Mahirqızı ilə görüşüb.

Görüşdə iki ölkənin KİV-ləri arasında əlaqələr və müxtəlif istiqamətlərdə əməkdaşlıq müzakirə olunub

Diplomat ölkəsinin Azərbaycanla əlaqələrə böyük önəm verdiyini və davam edən Vətən müharibəsində Azərbaycanın ədalətli işini dəstəklədiyini qeyd edib.

O, iki ölkə arasında turizm, informasiya texnologiyaları və digər sahələrdə əməkdaşlıq, qarşılıqlı sərmayə qoyuluşu ilə bağlı mühüm layihələr üzərində işlədiyini bildirib. Səfir onu da vurğulayıb ki, iki ölkənin media qurumları arasında əməkdaşlıq proqramının təşkili, bir-birini daha yaxından tanımaq və perspektiv sahələrlə tanış olmaq üçün hər iki ölkə jurnalistlərinin qarşılıqlı səfərlərinin təşkili istiqamətində iş aparılır. Feysəl bin Abdullah Əl Henzab Azərbaycan Vətən Müharibəsi başa çatdıqdan və koronavirus pandemiyasından sonra Azərbaycan ilə Qətər arasında münasibətlərin daha da dərinləşməsi üçün yeni imkanların yaranacağına əminliyini ifadə edib.

V.Mahirqızı da öz növbəsində Qətər dövlətinə və onun mediasına Azərbaycanın ədalətli işində göstərdiyi dəstəyə görə minnətdarlığını bildirib. V.Mahirqızı Azərbaycan və Qətərin hər zaman dost ölkələr olduğunu, APA İnformasiya Agentliyinin Qətərin Azərbaycandakı səfirliyi, eləcə də bu ölkənin media qurumları ilə hər zaman sıx əməkdaşlıq etdiyini diqqətə çatdırıb. Bildirilib ki, APA-Qrupu əlillərin müraciəti əsasında Gəncə, Bərdə və digər şəhərlərin ermənilər tərəfindən raketlərdən atəşə tutulması nəticəsində insanların həlak olması, yaşayış binalarının, mülki obyektlərin dağıdılmasını əks etdirən materialları onlara təqdim edib. Cəzirənin Türkiyədəki bürosu.

O, həm ölkələrimiz, həm də ölkələrin media qurumları arasında əməkdaşlığın dərinləşdirilməsi üçün geniş rifahların olduğunu deyib, bunun üçün birgə layihələrin həyata keçirilməsinin, o cümlədən media nümayəndələrinin qarşılıqlı səfərlərinin təşkilinin vacibliyi diqqətə çatdırılıb.

V.Mahirqızı qeyd edib ki, APA-Qrupuna daxil olan qurumlar ölkələrimiz arasında əlaqələrin daha da dərinləşdirilməsi işinə informasiya dəstəyi verməyə hazırdır.

Fişinq hücumu APA Agentliyinə məxsus www.apa.az internet səhifəsini ələ keçirib.

Saytda SOCAR-a qarşı heç vaxt APA-da yayılmayan təxribat xarakterli məlumatlar yerləşdirilib. Tamamilə fərqli domen altında yerləşdirilən fişinqin məqsədi vətəndaşları səhm almaq bəhanəsi ilə aldatmaqdır. APA-nın dizaynından, loqo üslubundan və hətta müəllif imzasından istifadə etməklə səhifənin fişinqindən istifadənin səbəbi Agentliyin etibarlı və etibarlı məlumat mənbəyi kimi qəbul edilməsidir.

APA Media Qrupu qeyd edir ki, şirkət əməkdaşları bundan mayın 11-də xəbər tutub və dərhal Rəqəmsal İnkişaf və Nəqliyyat Nazirliyinin Elektron Təhlükəsizlik Xidmətinə rəsmi müraciət edilib.

Müraciətdə APA  və SOCAR-ı təhrif edən, yalan xəbərlər yayan saytla bağlı araşdırma aparılaraq tədbir görülməsi tələb olunub.

Şirkət bir daha qeyd edir ki, APA-nın rəsmi internet ünvanı www.apa.az domenidir.

APA GROUP-a daxil olan apasport.az saytı yenilənib. Ölkəmizin ilk azərbaycandilli idman saytı yeni dizayn və məzmunda oxucuların qarşısına çıxıb.

Azərbaycan mətbuatında ilk dəfə olaraq oyunların onlayn nəticələri idman saytında dərc olunur. Futbolsevərlər, eləcə də bütün idman növlərini sevənlər burada matçları canlı izləyə bilərlər. Hər bir ölkə üzrə turnir cədvəlləri onlayn olaraq yenilənir, apasport.az saytında heç bir yerdə dərc olunmayan statistika ilə tanış ola bilərsiniz.

İşə başladığı ilk gündən dünya və Azərbaycan idmanında baş verən ən mühüm hadisələri oxucularına çatdıran Apasport.az saytı proqnozlaşdırıcılara da kuponlar təqdim edir. Günün Kuponu, Tək Kupon və Ekspres Kupon bizim xüsusi proqnozçular komandamız tərəfindən tərtib edilir. Yaxın vaxtlarda bu işə əcnəbi mütəxəssislərin və fəal proqnozçuların cəlb olunması nəzərdə tutulur.

“Ekspert rəyi”ndə tanınmış futbol mütəxəssislərinin oyunlarla bağlı proqnozları da öz əksini tapıb. Apasport.az saytında həm yerli, həm də əcnəbi mütəxəssislərin qarşılaşmalardan gözləntilərini öyrənə bilərsiniz.

Yaxın vaxtlarda oxucular arasında müsabiqələrin keçirilməsi də nəzərdə tutulur. Bundan əlavə, sizə tez-tez maraqlı videolar təqdim edəcəyik.

Saytda yeni bölmələr də var.

“Ofsayd” bölməsi uzun illər oyundankənar vəziyyətdə olanlara, “Ulduzlar” bölməsi isə dünya şöhrətli idmançıların həyatına həsr olunub.